កម្លាំងនគរបាលព្រហ្មទណ្ឌការិយាល័យកម្រិតស្រាលនៃស្នងការនគរបាលរាជធានីភ្នំពេញ នៅព្រឹកថ្ងៃទី៤ ខែធ្នូ ឆ្នាំ២០២១នេះ បានបញ្ជូន លោក ប៊ុន ផាក ហៅគ្រូជោគជ័យ មកសាលាដំបូងរាជធានីភ្នំពេញ ពាក់ព័ន្ធការក្លែងបន្លំជាមេធាវី។
ក្រោយឃាត់ខ្លួនបញ្ជូនទៅសាកសួរនៅសាលាដំបូងរាជធានីភ្នំពេញរួចមក ស្រាប់តែនៅមុននេះបន្តិចលេចឮព័ត៌មានថា លោកគ្រូជោគជ័យរូបនេះ ត្រូវបានដោះលែងឲ្យមានសេរីភាពវិញហើយ។
ជាក់ស្ដែង បើយោងតាមគណនីហ្វេសប៊ុកឈ្មោះ «Phorn Sophal» បានបង្ហោះរូបថតជាច្រើនសន្លឹកនៅព្រលប់ថ្ងៃទី៤ ខែធ្នូ ឆ្នាំ២០២១ អមដោយសារបញ្ជាក់ដូច្នេះថា «ឮថា , ដោះលែង លោកគ្រូជោគជ័យហើយ ! សូមមេត្តាឯកឧត្តមរដ្ឋមន្ត្រីក្រសួងយុត្តិធម៌ ពិនិត្យបញ្ហានេះផង ជៀសវាង ការលុបបំបាត់និទណ្ឌភាពនៃបទល្មើស គ្មានប្រសិទ្ធភាព។ ពិសេសសូមអោយអ្នកនាំពាក្យអយ្យការអមសាដំបូងរាជធានីភ្នំពេញ ចេញសេចក្តីថ្លែងថា, បញ្ជាក់ផង (ឆន្ទានុសិទ្ធិ) ឬ ……..….???»។
បើយោងតាមគណនីហ្វេសប៊ុកឈ្មោះ «Oun Vansak» ដែលជាអ្នកតាមដានរឿងនេះយ៉ាងសកម្មផងនោះ បានបញ្ជាក់ដែរថា «សូមចប់ត្រឹមនឹង តួរងត្រូវបានដោះលែងវិញ ចំណែកតួប្រុស និងតួស្រី បែកគ្នាជារៀងរហូត ចំណែកអ្នកតាមដាន ដាច់បាយ អស់អង្ករហូប»។
គួរបញ្ជាក់ថា គ្រូបង្រៀនវិធីសាស្ត្រជោគជ័យ ឈ្មោះ ប៊ុន ផាក ត្រូវបានម្លាំងសមត្ថកិច្ចឃាត់ខ្លួន កាលពីល្ងាច ថ្ងៃទី៣ ខែធ្នូឆ្នាំ២០២១ នៅរាជធានីភ្នំពេញ។ ជនសង្ស័យមានឈ្មោះ ប៊ុន រស្មី ហៅ ប៊ុនផាក (BunPak ) អាយុ ២៨ឆ្នាំ ដែលមហាជនភាគច្រើនស្គាល់ថា ជាអ្នកបង្ហាត់បង្ហាញលើជំនួញជោគជ័យ និងជាអគ្គនាយកក្រុមហ៊ុន Camazone បំរើសេវាកម្មទិញទំនិញពីក្រៅស្រុកមកខ្មែរ៕
