ក្រោយពីដេកយល់សប្ដិឃើញលោកជំទាវ ឧកញ៉ា អ៊ាន សៀវម៉ី ហៅខ្លួនទៅលេងផ្ទះនោះ ស្រាប់តែ លោក ដែន សូនី បានឡាយវីដេអូ លើកសរសើរ មិនដាច់ពីមាត់ និងប្រកាសស្វែងរកមធ្យោបាយក្នុងការជួបអ្នកលក់ផលិតផលតាមអនឡាញដ៏ល្បីរូបនេះទៀតផង។
លោក ដែន សូនី បានឡាយវីដេអូ នៅរសៀលថ្ងៃទី១ ខែធ្នូ ឆ្នាំ២០២១ ដោយលើកយកលោក ជំទាវ ឧកញ៉ា អ៊ាន សៀវម៉ី ធ្វើជាប្រធានបទ ហើយដាក់ចំណងជើងថា «ថ្ងៃនេះសុំនិយាយដើមបងឧកញ៉ាសៀវម៉ី»។
នៅក្នុងការឡាយនោះ លោក ដែន សូនី អះអាងថា រាល់ថ្ងៃខ្លួនស្រឡាញ់ចរិតលោកជំទាវឧកញ៉ា អ៊ាង សៀវម៉ី ណាស់ ហើយចង់បានលេខទូរសព្ទគាត់ តែមិនដឹងទាក់ទងតាមណាទេ។ លោកថា លោក ធ្លាប់ទៅចែកអំណោយជាមួយលោកជំទាវម្ដង ឃើញថា ចរិតគាត់ថ្លៃថ្នូរ មានចិត្តទូលាយទាំងប្ដី និងប្រពន្ធ។
លោក បានសរសើរទៀតថា លោកជំទាវ ល្អតាំងពីការនិយាយស្ដី, ដំណើរ, ស្អាតទាំងចិត្ត ស្អាតទាំងកាយ, ជាមនុស្សស្រីម៉ឺងម៉ាត់, ច្បាស់លាស់ ឆ្លាត ហើយពូកែ, មាន តែសាមញ្ញ អត់ឫក, ចរិតថ្លៃថ្នូរ, ចេះគោរពឲ្យតម្លៃប្ដី, ជាមេផ្ទះគំរូ និងមិនចេះនិយាយដើមគេនោះទេ។
ជាមួយគ្នានេះ លោក ដែន សូនី បាននិយាយពីការយល់សប្ដឃើញលោកជំទាវ ហៅទៅលេងផ្ទះ ហើយលោក ក៏បង្ហាញក្ដីរំពឹងថា នឹងបានទៅជួបលោកជំទាវ ញុំាអីជាមួយគ្នា និយាយគ្នាលេង។ ការនិយាយបែបនេះ មិនទាន់ផុតមាត់ផង ស្រាប់តែលោកជំទាវ ឧកញ៉ា អ៊ាន សៀវម៉ី ចូលមកមើលការឡាយ ជាហេតុធ្វើឲ្យលោកសូនី រំភើបស្ទើរហោះទៅហើយ។
ក្នុងពេលនោះ ដើម្បីសម្រេចបំណងរបស់លោក ដែន សូនី, លោកជំទាវ ឧកញ៉ា អ៊ាន សៀវម៉ី ថែមទាំងទម្លាក់លេខទូរសព្ទជូនថែមទៀតផង។ ក្រោយពី បានលេខទូរសព្ទរួចមក លោក សូនី ថា លោកនឹងទៅជួបលោកជំទាវឆាប់ៗខាងមុខនេះហើយ៕ សូមទស្សនា វីដេអូ ខាងក្រោមនេះ ទាំងអស់គ្នា ៖
