បទ «Are You Ok?» ដែលផលិតកម្មGalaxy Navatra ទិញសិទ្ធិសំឡេងពីមេធីមនាគហោះ យកមកផលិតជាបទចម្រៀងស្ដង់ដារអន្តរជាតិ ហើយចេញMVជាផ្លូវការកក្រើកបណ្ដាញសង្គមយូធូបនោះ ពេលនេះ ត្រូវបានសារព័ត៌មានដ៏ល្បីមួយរបស់ឥណ្ឌា លើកជាប្រធានបទ យកទៅចុះផ្សាយទៀតផង។
បទនេះ បានចេញMVជាផ្លូវការកាលពីថ្ងៃទី៤ ខែវិច្ឆិកា ឆ្នាំ២០២១ ហើយគិតរហូតមកដល់ថ្ងៃទី១៦ ខែវិច្ឆិកា ឆ្នាំ២០២១នេះ មានអ្នកទស្សនាសរុបរហូតដល់៤៤លានដងឯណោះ។ ក្រោយពីផ្ទុះកក្រើកបែបនេះ មានសារព័ត៌មានបរទេសមួយចំនួន បានយកទៅចុះផ្សាយព្រោងព្រាតទៀតផង។
ក្នុងចំណោមសារព័ត៌មានបរទេសនោះ ក៏មានគេហទំព័រដ៏ល្បីមួយរបស់ប្រទេសឥណ្ឌាឈ្មោះBollywood Life ធ្វើការចុះផ្សាយផងដែរ នៅថ្ងៃទី១៦ ខែវិច្ឆិកានេះ ដោយលើកឡើងពីសន្ទុះនៃភាពល្បីល្បាញរបស់បទនេះ ហើយបានរៀបរាប់ពីក្រុមផលិតករទាំងអស់របស់ «Are You Ok?» ទៀតផង។
ក្រោយពីគេហទំព័រដ៏ល្បីឥណ្ឌាចុះផ្សាយនោះ លោកយឹម តាស្រង់ នាយកចាត់ការទូទៅផលិតកម្ម Galaxy Navatra បានលើកឡើងថា «នៅពិភពភាពយន្ត Hollywood គេមានសារព័ត៌មាន Hollywood Life, រីឯនៅពិភពភាពយន្តBollywood គេមានសារព័ត៌មាន Bollywood Life ប៉ុន្តែពេលនេះចម្រៀងខ្មែរមានឱកាសបង្ហាញខ្លួនលើសារព័ត៌មានដ៏ល្បី១នេះ»៕
