សោកស្ដាយ! សិល្បករជើងចាស់ផ្នែកល្ខោនបាសាក់ក្រុម ភី សុគន្ធី លោកតា ការ៉េ បានទទួលមរណភាពហើយ

នៅមុននេះបន្តិចមហាជនអ្នកប្រើប្រាស់បណ្ដាញសង្គមមានការភ្ញាក់ផ្អើល និងតក់ស្លុតជាខ្លាំង បន្ទាប់ពីទទួលដំណឹងថា សិល្បករជើងចាស់ផ្នែកល្ខោនបាសាក់ក្រុម ភី សុគន្ធី ដ៏មានទេពកោស្យលោកតា ការ៉ា បានទទួលមរណភាពហើយ ។ នេះបើយោងតាមការបញ្ជាក់ពីអ្នកនាង ផន សុផារី អតីតតារាកំប្លែង និងល្ខោនបាសាក់ ។

ដោយអ្នកនាង ផន សុផារី បានសរសេរនៅលើគណនីហ្វេសប៊ុកផ្លូវការរបស់ខ្លួនឱ្យដឹងយ៉ាងដូច្នេះថា៖ «បងប្អូនដែលនិយមចូលចិត្តទស្សនាល្ខោនបាសាក់ ភី សុគន្ធី ណាខ្លះស្គាល់លោកតា ការ៉េ?  ពេលនេះលោកតាបានទទួលមរណភាពហើយ» ។

យ៉ាងណាជាមួយគ្នានោះ ផន សុផារី ក៏មិនបានបញ្ជាក់ពីមូលហេតុនៃការបាត់បង់ជីវិតរបស់តា ការ៉េ ឡើយ ដោយគ្រាន់ប្រ​កាសជាដំណឹង និងបង្ហាញអារម្មណ៍សោកស្ដាយ ។

ប៉ុន្តែនៅព្រឹកថ្ងៃទី១៥ ខែវិច្ឆិកា ឆ្នាំ២០២១នេះ ស្រ្តីឈ្មោះ ស្រីអូន ដែល​ត្រូ​វ​​​​ជាកូន​បង្កើត​របស់លោក អៀង នៅ ហៅ​តាការ៉េ ក៏បានបញ្ជាក់តាម​ទូរស័ព្ទ​ឱ្យ​សារ​ព័ត៌​មាន​តា​រាញូស៍​ឱ្យដឹង​ថា ឪពុករបស់ខ្លួន​បានទទួលមរណភាពក្នុងអាយុ៦៧ឆ្នាំ ខណៈ​កំពុង​មាន​ជំងឺ​ប្រចាំកាយ ។

ប្រភពដែលត្រូវជាកូនខាងលើបានអះអាងថា លោក អៀង នៅ ដែលជាឪពុកបានទទួលមរណភាពនៅអាយុ៦៧ ឆ្នាំ ខណៈមាន​ជំងឺពុក​ឆ្អឹង​ជាង៤​ឆ្នាំ​ហើយ និង​​ត្រូវលេបថ្នាំជាប្រចាំ ពោលគឺចាប់តាំងពីឈប់ពីល្ខោនបាសាក់ក្រុម ភី សុគន្ធី មក ។ តែ​នៅពេលថ្មីៗ​នេះលោក អៀង នៅ ហៅតាការ៉េ ក៏បានទៅ​លេង​ផ្ទះក្មួយ​នៅខេត្តកំពង់ឆ្នាំង ហើយ​នៅថ្ងៃទី១៤ ខែវិច្ឆិកា ម្សិលមិញនេះ ទំនង​ជាជំងឺចាស់​របស់​លោក​ធ្វើ​ទុកឡើយ ទើបលោកបានទទួលមរណភាពនៅពេលបញ្ជូលទៅដល់មន្ទីរពេទ្យខេត្ត ។

យ៉ាងណាបច្ចុប្បន្នសពរបស់លោក អៀង នៅ កំពុងធ្វើបុណ្យ​តាម​ប្រពៃណី​នៅខេត្ត​កំពង់​ឆ្នាំ និងត្រូវមកធ្វើបុណ្យបន្តនៅឯផ្ទះនៅខេត្តតាកែវនៅថ្ងៃស្អែក ។ នេះបើតាមការ​បញ្ជាក់​ពីស្ត្រី​ឈ្មោះ ស្រីអូន ដែលត្រូវជាកូន ។

គួរបញ្ជាក់ផងដែរថា លោក អៀង នៅ ដែលមហាជនជា​ច្រើន​បានស្គាល់​នៅក្នុងវង្វង់​សិល្បៈ​ថា តាការ៉េ គឺ​ជា​សិល្ប​ករជើងចាស់មួយរូប ដែលមាន​ទេពកោសល្យ​ខ្ពស់ទាំងផ្នែ​ក​កំប្លែង និងល្ខោន​បាសាក់ ។ ហើយមរណភាពរបស់លោក អៀង នៅ នេះក៏ជាការ​បាត់បង់​នូវធន​​ធាន​មនុស្ស​ដ៏​កម្រ ៕
ប្រភពពី​តារា​ញូស៍​

ដេីម្បី​កាន់​តែ​ជ្រាប​ច្បាស់​សូម​ទស្សនា​រូបភាព​ខាងក្រោម​ទាំង​អស់​គ្នា​៖

Related posts

Leave a Comment