ភ្នំពេញ ៖ គេនៅចាំបានថា នាយ សែ ភិន ហៅ នាយចយ និង ភរិយា ប៉ិន ក្វាន់ឌី បានរៀបអាពាហ៍ពិពាហ៍ កាលពីថ្ងៃ ២៧ ខែកុម្ភៈ ឆ្នាំ២០១៨ នៅវិមានពិភពថ្មីសែនសុខ។ ពិធីរៀបមង្គលការនេះ ត្រូវបានរៀបចំយ៉ាងអធិកអធម អមដោយតារាកំប្លែងល្បីៗជាច្រើននាក់។
ក្រោយរៀបការ នាយ ចយ រួមនឹងភរិយាជាទីស្រឡាញ់ ក៏ទទួលបានសមាជិកថ្មី ជាកូនដំបូងរបស់ពួកគេ ដោយកើត កាលពីថ្ងៃទី១៤ ខែកញ្ញា ឆ្នាំ២០១៩ ក្រោមការសាទរពីអ្នកសិល្បៈ និងអ្នកគាំទ្រជាច្រើនទៀត។
គិតមកទល់នឹងពេលនេះ នាយចយ និងភរិយាអ្នកនាងខ្វាន់ឌី បានរៀបការជាមួយគ្នាអស់រយៈពេលជិត៤ឆ្នាំមកហើយ ហើយកូនប្រុសរបស់ពួកគេ មានអាយុប្រហែល២ឆ្នាំ។ ក្នុងរយៈពេលនេះពួកគេបានចាប់ដៃគ្នាខិតខំរកស៊ី ហើយទីបំផុត ក៏ទទួលលេចចេញជាផ្លែផ្កា ដោយពួកគេ ធ្វើពិធីក្រុងពាលី សាងសង់ផ្ទះថ្មី។
បង្ហោះភ្ជាប់ជាមួយពិធីក្រុងពាលី សាងសង់ផ្ទះ នៅថ្ងៃទី១១ ខែវិច្ឆិកា ឆ្នាំ២០២១នោះ ភរិយានាយចយ បានរៀបរាប់ថា «ថ្ងៃទី11ខែ11ឆ្នាំ2021ថ្ងៃលាភថ្ងៃជ័យ សូមអោយកូនចៅជោគជ័យ មានសិរីសួស្ដី អ្វីដែរកូនចៅប្រាថ្នាសូមអោយបានសម្រេចដូចបំណង»។
គួរបញ្ជាក់ថា មុនពេលរៀបការនោះ មានការរិះគន់ជាច្រើន មកលើពួកគេ ដោយភាគច្រើនលើកឡើងថា ចំណងស្នេហ៍មួយនេះ កើតឡើងដោយសារតែលុយ បើមិនមែនលុយ ក៏គេមិនយកនាយចយនោះដែរ។ តែអ្វីៗកាន់តែបង្ហាញច្បាស់ថា ចំណងស្នេហ៍មួយនេះ មិនមែនកើតឡើងដោយសារលុយនោះឡើយ ហើយក៏អាចស្រាយមន្ទិលរបស់អ្នករិះគន់ផងដែរ។
ជាក់ស្ដែង ភរិយានាយចយ នាងខ្វាន់ឌី ធ្លាប់លើកឡើងថា «មិនដែលស្រលាញ់អ្នកណាដោយសារឋានៈ ឬលុយកាក់ ប៉ុន្តែបើស្រលាញ់គឺស្រលាញ់ដោយសារទឹកចិត្តស្រលាញ់ ចេះមើលថែយកចិត្តទុកដាក់នឹងគ្នា និងព្រមទទួលយកចរិតពិតរបស់គ្នា លុយកាក់បើខ្វះខាតអាចជួយគ្នារកបាន សុំត្រឹមតែស្មោះត្រង់ទាំងនៅមុខ និងក្រោយខ្នងក៏គ្រប់គ្រាន់…….»៕
