គេនៅចាំបានថា កាលពីដើមឆ្នាំ២០២០ តារាចម្រៀង តន់ ចន្ទសីម៉ា បានចុះកុងត្រាជាមួយនិពន្ធ ដោយខ្លួនស្ម័គ្រចិត្តកាត់ប្រាក់២០ភាគរយ រកចំណូលបានពីការងារសិល្បៈ ជូនអ្នកនិពន្ធ ដែលខិតខំផលិតបទចម្រៀងឲ្យខ្លួនច្រៀង។
ក្រោយពីតន់ ចន្ទសីម៉ា ស្ម័គ្រចិត្តធ្វើដូច្នេះរួចមក នៅពេលនោះ លោក យឹម តាស្រង់ បានបង្ហាញអារម្មណ៍របស់ខ្លួនដូច្នេះថា «រំភើបបំផុតមួយជីវិតនេះ ខ្ញុំទើបជួបម្តងទេ ដែលតារាចម្រៀងម្នាក់ហ៊ានចែកផ្តល់ចំណូលមកខ្ញុំជាអ្នកនិពន្ធ 20% ពីការចេញច្រៀងគ្រប់កម្មវិធីប្រគំតន្ត្រី និងស្ពតពាណិជ្ជកម្មទាំងអស់ក្នុងរយៈពេលដ៏វែងដោយភាពពេញចិត្ត»។
លោក បន្តថា «អរគុណណាស់នូវការយល់ពីតម្លៃនៃអ្នកនិពន្ធ ហើយមួយរយៈនេះបងលើកប្អូនស្រីពិតជាមិនខកបំណងមែន អរគុណនូវទឹកចិត្តដឹងគុណរបស់ប្អូនមកលើបង ប្អូនប្រហែលជាអ្នកចម្រៀងទី១ ហើយបងក៏ប្រហែលជាអ្នកនិពន្ធទី១ផងដែរដែលបានទទួលការចែកភាគលាភបែបនេះពីតារាចម្រៀងកំពុងល្បីម្នាក់បែបនេះ បងនិងខិតខំព្យាយាមបន្តទៀតដើម្បីប្អូន»។
លោកយឹម តាស្រង់ បានបញ្ជាក់ទៀតថា «ហើយក៏អរគុណផងដែរដល់បងប្អូនក្រុមមេធាវី និងសាក្សី ហើយជាពិសេសនោះអរគុណដល់អគ្គនាយកផលិតកម្ម Galaxy Navatra ឧកញ៉ា ឡេង ណាវ៉ាត្រា ដែលបានចូលរួមជាកិត្តិយសដឹងលឺក្នុងកិច្ចសន្យានេះ។ តន់ចន្ទសីម៉ា»។
ដោយឡែក នៅថ្ងៃទី៩ ខែវិច្ឆិកា ឆ្នាំ២០២១នេះ កវីនិពន្ធដ៏ល្បីរូបនេះ បានរំលឹករឿងនេះឡើងវិញ ដោយរៀបរាប់ថា «រំលឹករឿងអ្នកនិពន្ធដក%20ពីអ្នកចម្រៀង ខណៈនេះខ្ញុំធ្វើរឿងនេះបានយ៉ាងជោគជ័យ រំលឹករឿងខ្ញុំដក%20ពីគាត់គ្រប់កម្មវិធីកាលពីជាងមួយឆ្នាំមុននោះ មានការប្រតិកម្មយ៉ាងច្រើនគួរសមពីតារាចម្រៀងមួយចំនួន
តែពួកយើងនៅតែរក្សាផែនការពួកយើងដដែល ដោយខិតខំដោយស្នាមញញឹម ទីបំផុតលទ្ធផលពេញជាង១ឆ្នាំនៃ “%20” នេះបើគិតជាផលប្រយោជន៍ទទួលបានគឺអាចរស់ចាយវាយបែបសាមញ្ញរបស់អ្នកនិពន្ធ គឺអាចទិញផ្ទះល្វែងសមរម្យ “១ល្វែង”រស់នៅដោយមិនបាច់បង់រំលស់ថែមទាំងអាចទិញ “កូនឡាន” ជិះមួយដែលអាចមានលទ្ធភាពចាក់សាំងបាន»។
លោក បានធ្វើការផ្ដាំផ្ញើថា «ជាចុងក្រោយមានតែពាក្យផ្ដែផ្ដាំអ្នកនិពន្ធចម្រៀងទាំងអស់សូមរស់ជាមួយផែនការផ្ទាល់ខ្លួន កុំរស់រេតាមខ្យល់ជាមួយសម្តីអ្នកដទៃកាច់ចង្កូត ការរស់នៅបែបសម័យថ្មីកុំខ្លាចគេសើចឬឌឺ,ដងថាអ្នកមុខលុយប្រសិនបើអ្នកនិយាយរឿងលុយជាមួយគេតែអ្នកត្រូវសួរគេថាតើអ្នករស់ដោយមិនមានលុយសោះបានទេក្នុងជីវិតនាពេលបច្ចុប្បន្ន? ហើយត្រូវចងចាំថាមនុស្សសម័យថ្មីគឺ” ត្រូវចេះឱ្យប្រយោជន៍គ្នាទៅវិញទៅមក”»។
គួរបញ្ជាក់ថា កាលពីថ្ងៃទី៨ ខែវិច្ឆិកា ឆ្នាំ២០២១ម្សិលមិញនេះ តារាចម្រៀងស្រី គ្រាប់ពេជ្រប្រចាំផលិតកម្មGalaxy Navatra បានក្លាយជាទូតសុឆន្ទៈរបស់ក្រុមហ៊ុនទូរសព្ទស្មាតហ្វូន vivo ស្របពេលកំពុងជោគជ័យខ្លាំងលើវិថីសិល្បៈ៕
