ប្រិយមិត្តមួយចំនួនធំ បានជ្រាបរួចមកហើយថា កូនប្រុសច្បងរបស់អ្នកនាង ដេត ម៉ាលីណា មានឈ្មោះថា ឈ្មោះ ឌួង គីមវិសាល ហៅឌុប មានបញ្ហាភ្នែកមើលឃើញត្រឹមតែពណ៌សខ្មៅប៉ុណ្ណោះ ខណៈខួរក្បាលក៏មានបញ្ហាទៀត។
កាលពីល្ងាចថ្ងៃទី៧ ខែវិច្ឆិកា ឆ្នាំ២០២១កន្លងទៅនេះ ឆ្លៀតពេលនាំកូនៗដើរលេងកម្សាន្តថ្ងៃអាទិត្យ នោះ អ្នកនាង ដេត ម៉ាលីណា បានឡាយ បង្ហាញមុខកូនប្រុសច្បងរូបនេះ ឲ្យអ្នកគាំទ្រ បានឃើញទៀតផង ហើយពេលឃើញការនិយាយស្ដី និងកាយវិការរបស់គេរួចមក ម្នាក់ៗពិតជាអាណិតរូបគេខ្លាំងណាស់។
ការអាណិតអាសូរនេះ ដោយហេតុថា រូបគេឈឺមិនទាន់ជានៅឡើយ និយាយបានមួយៗគាំង(បញ្ហាខួរក្បាល) រកនឹកនិយាយមិនចង់ចេញ ហើយភ្នែករបស់គេ ចេះតែធ្មេចបើកៗ ឥតឈប់ ព្រមទាំងមើលទៅមុខមិនចំនោះទេ។
ទោះយ៉ាងណា ក្មេងប្រុសស្ថិតក្នុងវ័យ១២ឆ្នាំរូបនេះ មិនភ្លេចឡើយនូវការអរគុណចំពោះពុកម៉ែបងប្អូន លោកតា លោកយាយ អ៊ំពូមី ព្រមទាំងសុំពាក្យជូនពរដើម្បីឲ្យរូបគេបានជាសះស្បើយឆាប់ៗផងដែរ។ លើសពីនេះ ថែមទាំងអះអាងថា កុំតែឈឺទេ កុំអី ជិះឡានពណ៌សទៅជួយលក់ដូរម៉ាក់នៅហាងទៀតផង។
ដោយឃើញថា កូនរបស់ខ្លួនឈឺហើយនៅតែឆ្លាតទៀតនោះ នៅថ្ងៃទី១០ ខែវិច្ឆិកា ឆ្នាំ២០២១នេះ អ្នកនាង ដេត ម៉ាលីណា ទប់ចិត្តមិនជាប់ ក៏រៀបរាប់យ៉ាងក្ដុកក្ដួលថា «កូនចេះណាស់មុនពេលអូនឈឺកំដរម៉ាក់ធ្វើការ លក់ដូរ និងកំដរម៉ាក់គ្រប់ពេលវេលាអត់ធុញអោយ តែបាននៅជិតម៉ាក់ចេះនិយាយលើកទឹកចិត្តម៉ាក់ពេលម៉ាក់អត់សប្បាយចិត្ត ពិតជាអាណិតកូនណាស់ ឈឺហើយនៅតែឆ្លាតចេះប្រើពាក្យសំដីល្អៗៗសង្ឃឹមកូនល្អរបស់ម៉ាក់ជាហើយឆ្លាតសុខភាពល្អដូចដើម»។
ចំណែកអ្នកគាំទ្រ បានត្រឹមបង្ហាញក្ដីអាណិត និងជូនពរថា «អាណិតត្រង់សួររកប៉ាៗ, សូមអោយក្មួយឆាប់បានជាសះស្បើយ និងបានជួយអ្នកម៉ាក់, ឆាប់ជាដូចដើមវិញអូនឌុប, ជូនពរក្មួយអោយឆាប់ជានឹងមានសុខភាពល្អណាក្មួយ, បានកូនអញ្ចឹងស្រលាញ់ងាប់ចោល»៕
