កាលពីពេលថ្មីៗកន្លងទៅនេះ កំពូលតារាចម្រៀង ខេមរៈ សិរីមន្ត បានបង្កើតពាក្យស្លោកមួយ ដោយមានខ្លឹមសារថា «យុវវ័យសម័យថ្មីបើមិនមានដីផ្ទាល់ខ្លួនទេមិនស្ទាវទេ» ធ្វើឲ្យមានការរិះគន់ជាច្រើនពីមហាជន។
ក្រោយពីមានការរិះគន់រួចមក កំពូលតារាចម្រៀងរូបនេះ ក៏បានធ្វើការបកស្រាយ និងសម្រេចកែតម្រូវឡើងវិញ ដោយបញ្ជាក់ថា «អរគុណបងប្អូនទាំងអស់គ្នា ដែលបានចាប់អារម្មណ៍លើពាក្យស្លោករបស់ខ្ញុំថា «យុវវ័យសម័យថ្មី បើមិនមានដីផ្ទាល់ខ្លួនទេមិនស្ទាវទេ» បងប្អូនខ្លះក៏យល់អត្ថន័យខ្ញុំចង់និយាយអប់រំប្អូនៗនៅវ័យជំទង់អោយស្រលាញ់របស់ទ្រព្យ និងចេះចំណាយប្រាក់អោយចំទិសដៅចង់អោយអនាគតគាត់បានល្អ
តែក៏មានបងប្អូនខ្លះមិនសប្បាយចិត្តនឹងពាក្យថា «ស្ទាវ»ចឹងខ្ញុំ នឹងកែតម្រូវឡើងវិញហើយ សូមបងប្អូនជួយកែតម្រូវទាំងអស់គ្នាដើម្បីជាប្រយោជន៍ដល់ការក្រើនរំលឹកទៅប្អូនៗយុវវ័យយើងអោយពួកគាត់បានរីកចម្រើនតែប៉ុណ្ណោះតោះចូលរួមកែតម្រូវទាំងអស់គ្នា———«យុវវ័យសម័យបើអត់ដី……………»គួរពាក្យថាម៉េច»។
ដោយឡែក នៅក្នុងការឡាយនៅយប់ថ្ងៃទី៩ ខែតុលា ឆ្នាំ២០២១នេះ លោក បានបង្ហាញអារម្មណ៍សប្បាយចិត្ត នៅពេលមានការចាប់អារម្មណ៍ខ្លាំងទៅលើសុភាសិតរបស់លោក ហើយក៏មិនបដិសេធចំពោះការរិះគន់នេះ នោះទេ។
លោក បានបញ្ជាក់ថា តាមពិតការប្រើប្រាស់ពាក្យនេះ ដើម្បីឲ្យយុវជនមានការចាប់អារម្មណ៍ប៉ុណ្ណោះ បើលោកប្រើពាក្យផ្សេង ដូចជាពាក្យឡូយ, អស្ចារ្យ ប្រហែលពួកគាត់មិនចាប់អារម្មណ៍នោះទេ។
លោក បញ្ជាក់ថា ពាក្យស្ទាវនេះ តាមវចនានុក្រមសម្ដេចសង្ឃជួនណាត ស្មើនឹងពាក្យជំទង់ ប្រើចំពោះសត្វ ហើយជំទង់ មានន័យថា កំពុងលូតលាត់។ ដូច្នេះសុភាសិតរបស់លោក មានន័យថា«យុវវ័យសម័យថ្មីបើមិនមានដីផ្ទាល់ខ្លួនទេមិនលូតលាស់ទេ»។
លោក បកស្រាយតាមការយល់ឃើញ និងចំណេះដឹងរបស់ខ្លួនទៀតថា ពាក្យស្ទាវនេះ បើយោងប្រើក្នុងន័យល្អ គឺល្អហើយ បើប្រើក្នុងន័យមិនល្អ វាទៅជាមិនល្អ ដោយអាស្រ័យទៅលើឃ្លាភ្ជាប់របស់វានេះឯង។
លោកបន្ថែមថា អ្នកនិពន្ធបទចម្រៀងពីបុរាណ ក៏បានប្រើប្រាស់ការប្រៀបធៀបមនុស្សទៅនឹងសត្វ ឃ្មុំ សត្វកន្លង់ទៀតផង។ ចំណែក សត្វគោ អីជាដើម មានតម្លៃជាងពពួកសត្វនោះទៅទៀត រឿងអីប្រើមិនបាន។ តែមិនមែនចង់និយាយថា ពួកគាត់ជាសត្វនោះទេ គ្រាន់តែចង់សំដៅក្នុងន័យល្អ មានន័យថា លូតលាស់នេះឯង។
ដោយហេតុនេះហើយ លោក បានលើកទឹកចិត្ត កុំឲ្យស្អប់ពាក្យ«ស្ទាវ»នេះអី ព្រោះជាពាក្យរបស់ខ្មែរយើងនោះទេ នាំគ្នាប្រើប្រាស់វាទៅ។ ទោះយ៉ាងណា លោកក៏នៅតែបើកចំហក្នុងការចូលរួមកែតម្រូវពាក្យស្លោករបស់ខ្លួន ដើម្បីអភិវឌ្ឍយុវជនទាំងអស់គ្នា៕ ដើម្បីកាន់តែជ្រាបច្បាស់ទៀតនោះ សូមទស្សនា វីដេអូ ខាងក្រោមនេះ ៖
