កាលពីថ្ងៃទី៦ ខែវិច្ឆិកា ឆ្នាំ២០២១ កញ្ញា តេង ស៊ីណាត ហៅ អាជី បានបង្ហោះរូបថត១សន្លឹក អមដោយសារបញ្ជាក់ជុំវិញគ្លីនីកមួយ វះកាត់រូបនាងហើយ វេជ្ជបណ្ឌិតនោះ មិនទទួលខុសត្រូវ ទុកឲ្យនាងរងវបត្តិស្ទើរស្លាប់ស្ទើររស់។
ជាមួយនឹងការបញ្ជាក់នេះ អាជី ក៏បានប្រកាសថា នឹងបកស្បែកគ្លីនិកនោះទៀតផង ដោយមិនទុកឲ្យដើរបោកប្រាស់ប្រជាពលរដ្ឋខ្មែរទៀតនោះឡើយ ហើយអ្នកលក់ឡេដ៏ល្បីរូបនេះ ក៏បានអរគុណដល់វេជ្ជបណ្ឌិតនៅប្រទេសថៃ ដែលបានជួយនាងផងដែរ។
ទោះយ៉ាងណា ការបង្ហោះសារក្នុងបំណងកុំឲ្យបងប្អូនមួយចំនួនចាញ់បោកគ្លីនីកនោះដូចនាងនោះ បែរជាត្រូវមនុស្សមួយចំនួនសើចចំអកទៅវិញ ដោយសារតែពួកគេ គុំកួនរឿងកន្លងមក ដែលនាងធ្លាប់អះអាងថា ស្អាត ពីធម្មជាតិ ងើបពីគេអត់ងូតទឹក ក៏មានអារម្មណ៍ថា ខ្លួនឯងស្អាត ដែរនោះ។
ដោយហេតុថា មានអ្នកទើស និងសើចចំអកពេលនាងបញ្ហាបែបនេះនោះ កាលពីម្សិលមិញ អាជី សម្រេចថា នឹងមិនបកស្បែក បង្ហាញឈ្មោះគ្លីនីកនោះ ឲ្យមហាជន បានដឹងឮនោះឡើយ តែពេលនេះ នាងបានធ្វើការសម្រេចចិត្តជាថ្មីហើយថា នឹងធ្វើការបកស្បែកគ្លីនីកនោះវិញ ទោះមានអ្នកសើចយំនាងបែបណាក៏ដោយនោះ។
បង្ហោះភ្ជាប់ជាមួយរូបថតមួយសន្លឹករបស់ខ្លួនកំពុងស្ថិតនៅលើគ្រែពេទ្យ នៅរសៀលថ្ងៃទី៧ ខែវិច្ឆិកា ឆ្នាំ២០២១នេះ អាជី បានបញ្ជាក់ដូច្នេះថា «មាននាក់ខ្លះសើចយំខ្ញុំ ឌឺដងខ្ញុំទាំងដែលខ្ញុំកំពុងរងគ្រោះ តែខ្ញុំមិនខឹងនឹងពួកគាត់ទេ ព្រោះខ្ញុំគិតថា មនុស្សដែលកំពុងសើចចំអកគេទាំងដែលគេមិនដែលធ្វើអីខ្លួនសស់ គឺជាមនុស្សដែរគ្មានខួរក្បាល
ទោះបីខ្ញុំពេលនេះ ងើបមិនទាន់រួច តែខ្ញុំមិនចុះចាញ់ខ្ញុំនៅតែតស៊ូ ដើម្បីងើបមកឡាយបកស្បែកមុខពេទ្យដែល កំពុងតែដើរបោកគេ អោយបាន ខ្ញុំនឹងមិនអោយវារួចខ្លួន ហើយដើរបោកប្រជាជនខ្មែរតទៀតដែរ»។
ការបង្ហោះសារលើកនេះរបស់អាជី ហាក់មិនទទួលបានការសើចចំអកច្រើនដូចលើកមុនៗនោះទេ ដោយភាគច្រើន សុទ្ធតែលើកទឹកចិត្ត និងជូនពរនាងតែម្ដង។ ជាក់ស្ដែង ក្នុងចំណោមមតិជាច្រើននោះ ពួកគេ លើកឡើងថា «ជូនពរចែជីឆាប់ជា, មិនសើចទេ មានតែអាណិត គ្មានកំហុសទេ ដែលគ្រាន់តែចង់ស្អាតនោះ សូមអោយឆាប់ជាណាបងស្រី, ឆាប់ជាចែ, ស៊ូៗចែ កុំគិតច្រើន ជូនពរចែឆាប់ជា, ស៊ូៗចែ ព្យាយាមគង់តែបានសម្រេច។ កុំអស់សង្ឃឹម»៕
