លោកអ្នក បានជ្រាបរួចមកហើយថា កាលពីថ្ងៃទី១២ ខែកក្កដា ឆ្នាំ២០២១កន្លងទៅនេះ ពិធីការិនីដ៏ល្បីឈ្មោះ អ្នកនាង យុគ ចិន្ដា បានជួបទុក្ខជាទម្ងន់ ដោយម្ដាយជាទីស្រឡាញ់ស្មើជីវិត ទទួលមរណភាពត្រឹមមួយប៉ប្រិចភ្នែក។
ក្រោយពីម្ដាយទទួលមរណភាពនោះ អ្នកនាងយំសោកបោកខ្លួនជាខ្លាំង ដោយមិននឹកស្មានថា អ្នកមានគុណទៅលឿនបែបនេះសោះ។ ចំណែក មិត្តភក្ដិ, អ្នកសិល្បៈរួមអាជីព ក៏ដូចជាអ្នកគាំទ្រ បានចូលរួមរំលែកទុក្ខ និងសោកស្ដាយចំពោះរឿងនេះផងដែរ។
អ្នកនាង យុគ ចិន្ដា បានរៀបចំពិធីបុណ្យសពម្ដាយរបស់ខ្លួននៅវត្តគល់ទទឹង ស្ថិតក្នុងខណ្ឌច្បារអំពៅ រាជធានីភ្នំពេញ ហើយនៅមុននេះបន្តិច ដោយការនឹកស្រណោះម្ដាយខ្លាំងនោះ ពិធីការិនីរូបនេះ បានត្រឹមបង្ហោះសាររៀបរាប់យ៉ាងរំជួលចិត្តប៉ុណ្ណោះ។
បង្ហោះភ្ជាប់ជាមួយរូបថត និងវីដេអូ អ្នកនាង បានសរសេររៀបរាប់ទាំងយំក្ដុកក្ដួលដូច្នេះថា «អ្នកម្តាយរបស់កូនអើយ កូនអស់ម្តាយហៅហើយ ម្តាយទៅឆ្ងាយពីកូនហើយ កូនរស់ដោយគ្មានម៉ែពីពេលនេះតទៅ…..ម៉ែអើយ….
ហេតុអីក៏ម្តាយចាកចោលកូនលឿនម្ល៉េះ…….អ្នកម្តាយដ៏សែនមានគុណ កូនពិតជាទទួលយកមិនទាន់បានទេ អ្នកម្តាយអត់មានឈឺអីសោះ ឈុតថ្មីដែលម៉ែអោយកូនកាត់ទុកស្លៀកធ្វើបុណ្យរួមគ្នា ម៉ែនៅឯណា ម៉េចទុកកូនចោលបែបនេះ ម៉ែអើយម៉ែ កូនស្តាយណាស់ម៉ែ….
ម៉ែសាងបុណ្យច្រើនណាស់ម៉េចក៏ម៉ែអាយុខ្លីយ៉ាងនេះសូមដួងវិញ្ញាណក្ខន្ធម៉ែបានសោយសុគតិភពណាម៉ែ ជាតិណា ណា កូនប្រាថ្នាជាកូនម៉ែទៀត សូមម៉ែទៅអោយបានសុខណាម៉ែណា»៕
