ក្រោយពីតារាកំប្លែងដ៏ល្បីឈ្មោះអ្នកនាង ស្រេង សុកាន់ដា ហៅខ្ញុង ត្រូវបានផ្អាកការងារបណ្ដោះអាសន្ន ដោយសារបញ្ហាផ្ទាល់ខ្លួននោះ ពេលនេះ តារាកំប្លែង២រូប នឹងត្រូវបង្ហាញវត្តមាននៅក្នុងក្រុមកំប្លែងCBS។
លោក សុវណ្ណ ឬទ្ធី ហៅតាវ៉ិចទ័រ អ្នកដឹកនាំកម្មវិធីកម្សាន្ដរបស់ស្ថានីទូរទស្សន៍CTN និង ក្រុមកំប្លែងCBS បានបញ្ជាក់នៅលើគណនីហ្វេសប៊ុករបស់ខ្លួននារសៀលថ្ងៃទី២៧ ខែតុលា ឆ្នាំ២០២១ថា «តាមការណែនាំពីលោកអគ្គនាយកអគ្គនាយករងCBS លោកបានសម្រេចអោយខ្ញុំបាទ ជ្រើសតួកំប្លែងមកសម្តែងជាមួយជាមួយ ក្រុមកំប្លែងCBS មកដល់ថ្ងៃនេះខ្ញុំបាទ បានបញ្ជូលតួពីរនាក់ហើយ គឺបងចាប ចៀន និងពូណុយ នៅក្នុងកម្មវិធី ពីរគ្រួសារ ។ហេតុនេះសូមបងប្អូនជួយគាំទ្រផង។ សូមអរគុណ។សូមជួយ Shareផងបងប្អូន»។
បន្ថែមលើនេះ នៅក្នុងបទសម្ភាសន៍ជាមួយសារព័ត៌មានក្នុងស្រុកនារសៀលថ្ងៃទី២៧ ខែតុលា ឆ្នាំ២០២១ លោកតា វ៉ិចទ័រ បានបង្ហាញក្ដីរំពឹងថា សន្ទុះនៃការគាំទ្ររបស់មហាជន នឹងមានការកើនឡើងច្រើនផងដែរ ក្រោយអ្នកកំប្លែង២ដួងនេះបង្ហាញវត្តមាន។
តាមរយៈការប្រកាសដំណឹងនេះ លោក សុវណ្ណ ឬទ្ធី ហៅតាវ៉ិចទ័រ ត្រូវបានអ្នកប្រើប្រាស់បណ្ដាញសង្គមជាច្រើន សម្ដែងការគាំទ្រយ៉ាងខ្លាំង ខណៈមួយចំនួនទៀតលើកជាសំណួរ និងទទូចឲ្យទទួលយកអ្នកនាង ខ្ញុង ចូលមកលេងកំប្លែងវិញផងដែរ។
ចំពោះមតិគាំទ្រលើកឡើងថា «ខ្ញុំគាំទ្របង សូមឲ្យជោគជ័យនូវសមាជិកថ្មី ហេងហេងកាន់តែល្បី, គាំទ្រពេញទំហឹង, ឯកភាព ១០០%, កក្រើកហើយពេលនេះ, ដឹងតែល្អមើលទៀតហើយ, គាំទ្រពេញទំហឹងបងប្រុស ស្រលាញ់ទាំង២, ដឹងតែកាន់តែល្អមើលហើយ ព្រោះពួកគាត់សុទ្ធតែមានទេពកោសល្យក្នុងការសម្តែងស្រាប់»។
ចំណែកមតិមួយចំនួនទៀត លើកឡើងពាក់ព័ន្ធនឹងអ្នកនាងខ្ញុងថា «គួរតែឲ្យអ្នកនាងខ្ញុងចូលសម្ដែងវិញទើបល្អ កុំឃើញគាត់ធ្លាក់ទឹកហើយបោះបង់គាត់ចោលដូច្នេះអី គួរតែផ្ដល់ឱកាសឲ្យគាត់បានរកកម្រៃទ្រទ្រង់គ្រួសារបន្ត, បើអត់មានខ្ញុងមិនសូវល្អមើលទេ, ផ្ទះលេខពីរ បើអត់បងខ្ញុងប្រហែលផ្លូវក្នុងរាងយ៉ាប់បន្តិចហើយ។, ចុះអ្នកនាងខ្ញុងវិញអោយគាត់សំដែងទៀតទេលោកពូ»។
គួរបញ្ជាក់ថា កាលពីអ្នកនាងខ្ញុង ប្រកាសលាឈប់ពីCTNនោះ លោក តា វ៉ិចទ័រ ជួយសម្របសម្រួលឲ្យ បានចូលធ្វើការវិញជាធម្មតា។ ប៉ុន្តែ បន្ទាប់ពីជួបរឿងរ៉ាវជំពាក់បំណុលគេជាង៥៧ម៉ឺនដុល្លារ ផ្អើលទូទាំងប្រទេសនោះ, តារាកំប្លែងអ្នកនាង ស្រេង សុកាន់ដា ហៅខ្ញុង ត្រូវបានសម្រេចឱ្យផ្អាកពីការសម្ដែងមួយរយៈ៕
