គេនៅចាំបានថា តារាកំប្លែងដ៏ល្បីឈ្មោះ នាយតាក់ស៊ី បានលែងលះជាមួយប្រពន្ធ ដែលជាតារាកំប្លែងដូចគ្នា គឺអ្នកនាង ភីម កាលពីអំឡុងឆ្នាំ២០១៩ ក្រោយពីនាយ មានបញ្ហាជំងឺទឹកនោមផ្អែមនោះ។
ងាកមកជីវភាពរបស់នាយវិញ កាលពីមុនល្បីថា ក្លាយជាថៅកែដីឡូត៍, ថៅកែឡាន តែនៅពេលនេះ បែរជា ធ្លាក់ខ្លួននៅផ្ទះជួល១ខែតម្លៃ៦០ដុល្លារ ពេលខ្លះរកតែលុយបង់បន្ទប់ជួលសឹងតែមិនបានផង។ ទោះយ៉ាងណា ក្រោយពីទទួលដំណឹងនេះ លោកជំទាវ ស្រីនាង និងស្វាមី បានឧបត្ថម្ភថវិកាមួយចំនួនដល់នាយ តាមរយៈលោកអ៊ឹម ជីវ៉ាផងដែរ។
បង្ហោះភ្ជាប់ជាមួយរូបថតប្រគល់អំណោយដល់នាយ តាក់ស៊ីនោះ លោកអ៊ឹម ជីវ៉ា បានរៀបរាប់ថា «ហ៊ឺ..អាណិតតារាកំប្លែង នាយ តាក់ស៊ី ណាស់ ពីថៅកែឡាន ថៅកែដីឡូត៍ ជាតារាល្បីបែរជាធ្លាក់ខ្លួនជួលផ្ទះ១ខែ60$ ពេលខ្លះរកលុយបង់ថ្ងៃផ្ទះមិនបានផង សូមបងប្អូនជួយហៅគាត់ទៅថតដើម្បីបានប្រាក់កម្រៃផង»។
លោកបន្តថា «ដោយមើលឃើញពីភាពខ្វះខាតរបស់នាយតាក់ស៊ី តារាកំប្លែង CTN លោកជំទាវស្រីនាង និងស្វាមី ឧបត្ថម្ភថវិកាជូនដល់នាយ តាក់ស៊ី ចំនួន ១លានរៀល តាមរយៈលោកអ៊ឹម ជីវ៉ា ជូនដល់នាយតាក់ស៊ី»។
លោក អ៊ឹម ជីវ៉ា បានបន្ថែមទៀតថា «សូមបញ្ជាក់ផងដែរថា នាយតាក់ស៊ីជួលផ្ទះនៅម្តុំស្ថានីយទូរទស្សន៍ CTN ក្នុង១ខែ60$ ដោយនាយតាក់ស៊ីនិយាយថា សូមពុកម៉ែបងប្អូនជួយហៅគាត់ថតផងដើម្បីបានប្រាក់ចិញ្ចឹមគ្រួសារ ព្រោះសព្វថ្ងៃនេះគាត់ក្រខ្លាំងណាស់ ណាមួយត្រូវចិញ្ចឹមម្តាយនៅស្រុកទៀត»។
តាមរយៈនេះ ស្រាប់តែមានគណនីហ្វេសប៊ុកមួយបញ្ចេញយោបល់គួរឲ្យអស់សំណើចថា «ថៅកែដីឡូដ៍ ថៅកែលក់ឡាន ធ្លាក់ខ្លួនក្រមកពីមិនបានរៀនវគ្គជោគជ័យ ពីមុនខ្ញុំក៏ធ្លាក់ខ្លួនចឹង ដែរ ប៉ុន្តែខ្ញុំមិនមែនថៅកែអីទេ អ្នកធ្វើការឱ្យគេ បានប្រាក់ខែសមល្មមគួរសម បន្ទាប់មកខ្ញុំក៏បានចូលរៀនវគ្គជោគជ័យ ទើបធ្វើឲ្យខ្ញុំភ្លឺភ្នែកច្បាស់ ធ្វើឲ្យខ្ញុំមានថ្ងៃនេះ ដោយសារការគិតរបស់ខ្ញុំ ខ្ញុំនិយាយនេះមិនមែនចង់អួតទេបងប្អូន រាល់ខែបើមិនខ្ចីលុយគេ គឺអត់លុយឲ្យថ្លៃផ្ទះជួលគេទេ»។
ជុំវិញរឿងល្បីថា នាយតាក់ស៊ី ក្លាយជាថៅកែការ៉ាស់ឡាន ជាថៅកែដីឡូត៍កន្លងមកនោះ មិនមែនជាការពិតឡើយ ពោលគឺគ្រាន់តែ នាយ ត្រូវបានគេជួលឲ្យទៅឈរឈ្មោះប៉ុណ្ណោះ មិនមែនជាម្ចាស់ពិតប្រាកដឡើយ។ នេះបើតាមការបញ្ជាក់របស់នាយ តាក់ស៊ី ប្រាប់លោកអ៊ឹម ជីវ៉ា៕ ដើម្បីជ្រាបច្បាស់ សូមទស្សនា វីដេអូ ខាងក្រោមនេះ ៖
