កាលពីព្រឹកថ្ងៃទី១៩ ខែតុលា ឆ្នាំ២០២១កន្លងទៅនេះ លោកគ្រូ សៀវ សុផល បានឡាយវីដេអូ នៅលើទំព័រហ្វេសប៊ុករបស់ខ្លួន ដោយអះអាងថា ជាអ្នករៀបចំគំនិតដោះបំណុលអោយ អ្នកនាងខ្ញុង ធ្វើឲ្យនាង អាចដោះបំណុលនេះ ក្នុងរយៈពេលត្រឹម១យប់ប៉ុណ្ណោះ។
លោកគ្រូ បានបញ្ជាក់ដូច្នេះថា «ថ្ងៃនេះ អ្នកទាំងអស់គ្នាច្បាស់ជាបានឮព័ត៌មានខ្ញុង គាត់ជាប់បំណុលដល់៥៧២០០០។ បងប្អូនគ្រាន់តែអ្នកលក់ធម្មតាជំពាក់លុយច្រើន តែជំពាក់លុយច្រើន អត់បានយកលុយហ្នឹងមករកស៊ីទេ គឺដោយសារភាពភ័យខ្លាចៗ អញ្ចឹងភាពភ័យខ្លាច ធ្វើឲ្យយើងទន់ដៃទន់ជើង»។
លោកគ្រូ បានបន្តទៀតថា ខ្ញុង ភ័យ អត់ចេះពីរបៀបគ្រប់គ្រងភាពភ័យខ្លាច រហូតដល់នាងរកឃើញវ៉េបសាយរបស់លោក ហើយក៏មកជួបសិស្សរបស់លោក ហើយក៏ធ្វើការជាមួយគ្នាពេញមួយយប់ ដើម្បីរកឲ្យឃើញនូវបញ្ហារបស់គាត់ ព្រោះបំណុលភាគច្រើន មកពីការលាក់ប្ដី លាក់ប្រពន្ធ។ អញ្ចឹងអរគុណ ដែលគាត់បានចាកចេញពីបំណុលនៅក្នុងរយៈពេលតែមួយយប់»។
ក្រោយពីលោកគ្រូ ចេញមកអះអាងបែបនេះ បានធ្វើឲ្យអ្នកគាំទ្រអ្នកនាងខ្ញុង រួមទាំងអ្នកកំពុងស្អប់នាងស្រាប់ផង ចេញមុខរិះគន់ព្រោងព្រាត ហើយយល់ថា នេះជាគំនិតបោកប្រាស់ទឹកចិត្តមហាជន ទើបធ្វើឲ្យអ្នកនាងខ្ញុង ចេញមុខឡាយវីដេអូ បកស្រាយនៅព្រឹកថ្ងៃទី២០ ខែតុលា ឆ្នាំ២០២១ ដើម្បីកុំឲ្យមានការយល់ច្រឡំលើនាងនោះ។
នៅក្នុងការឡាយវីដេអូនោះ អ្នកនាង ខ្ញុង បានបញ្ជាក់ច្បាស់ៗ ដោយធ្វើការស្បថចំពោះមេឃដីថា នាងពិតជាបានជំពាក់លុយគេចំនួនដ៏ច្រើននេះពិតមែន ហើយថែមទាំងអំពាវនាវដល់ម្ចាស់បំណុលឲ្យមកជួបនាងទាំងអស់ផងដែរ ដោយយកអ្នកព័ត៌មានមកជាមួយផង ដើម្បីឲ្យមហាជនដឹងការពិតថា នាងជំពាក់គេមែន។
ទន្ទឹមនឹងនេះ អ្នកនាងខ្ញុង ក៏បានទម្លាយពីដំណើរដើមទងឈានទៅដល់ការសម្រេចចិត្តទៅជួបលោកគ្រូ សៀវ សុផល ដែលគេហៅថាជាគ្រូជោគជ័យ ដើម្បីផ្ដល់ជាគំនិតក្នុងការដោះបំណុលនេះផងដែរ។ អ្នកនាងថា គំនិតរបស់លោកគ្រូ ក៏ជាអ្វី ដែលអ្នកនាងចង់ធ្វើផងដែរ ទើបដាច់ចិត្តប្រកាសរឿងក្ស័យធននេះ។
ទោះយ៉ាងណា អ្នកនាង បានបញ្ជាក់ថា ថ្លៃសេវាក្នុងការជួបលោកគ្រូដើម្បីផ្ដល់ជាគំនិតនេះ ចំនួន១ម៉ឺនដុល្លារឯណោះ តែអ្នកនាង អត់លទ្ធភាពប្រមូលបានត្រឹមតែ៥០០ដុល្លារប៉ុណ្ណោះ ដើម្បីបានជួបលោកគ្រូ ហើយទីបំផុតលោកគ្រូ ក៏ព្រមជួបនាង។
បន្ថែមលើនេះ អ្នកនាង ក៏បានបញ្ជាក់ និងបង្ហាញចំនួនទឹកប្រាក់ ដែលទទួលបានពីសប្បុរសជនតាមរយៈ Acount ABA គឺ មានចំនួន ៥៦៥ ៣៣.៣៧ ដុល្លារ (ប្រាំម៉ឺន ប្រាំមួយពាន់ ប្រាំរយ សាមសិបបីដុល្លារ និងសាមសិបប្រាំពីរសេន) គិតត្រឹមព្រឹកថ្ងៃទី២០ ខែតុលា ឆ្នាំ២០២១នេះ៕ ដើម្បីកាន់តែជ្រាបច្បាស់ទៀតនោះ សូមទស្សនាវីដេអូ ខាងក្រោមនេះ ៖
