សិល្បករ និងមហាជនជាសប្បុរសជន ដែលជាអ្នកប្រើបណ្ដាញសង្គម និងអ្នកគាំទ្រជាច្រើន កំពុងតែខ្នះខ្នែងរៃអង្គាសថវិការបន្តិចបន្តួច ដើម្បីជួយដល់តារាកំប្លែងអ្នកនាង ស្រេង សុកាន់ដា ហៅ ស្រីខ្ញុង បន្ទាប់ពីនាងបានប្រកាសធ្លាក់ខ្លួនដល់ចំណុចសូន្យ និងជំពាក់បំណុលជិត៦០ម៉ឺនដុល្លារ ។
ដោយក្នុងនោះរួមមាន ទំព័រហ្វេសប៊ុក Pich Pich Shop ដែលគេស្គាល់ថា ជាម្ចាស់ហាងលក់ម៉ូតូ ប្រាក់ សម្បត្តិ បានប្រកាសឧបត្ថម្ភដល់អ្នកនាង ខ្ញុង ចំនួន៥០០ដុល្លារ និងលើកលែងថ្លៃជំពាក់ ២,៤០០ដុល្លារ ។
ក្រៅពីនេះ ក៏មានសិល្បកសិល្បការិនីជាច្រើនរូបដូចជា តារាចម្រៀងហង្សាមាសអ្នកនាង ពេជ្រ សូលីកា, តារាសម្ដែង នី មុន្នីនាថ, ឌុច លីដា, លោក ជី ដេវីត និងតារាចម្រៀងតារាសម្ដែងជាច្រើនរូបទៀត ក៏បានអំពាវនាវនៅលើបណ្ដាញសង្គម និងខ្នះខ្នែងជួយសម្រាលទុក្ខលំបាករបស់ប្ដីប្រពន្ធតារាកំប្លែងទាំងពីររូបនេះ។
គួរបញ្ជាក់ថា នៅមុននេះបន្តិចមហាជនមានការភ្ញាក់ផ្អើលជាខ្លាំង បន្ទាប់ពីតារាកំប្លែងល្បីឈ្មោះអ្នកនាង ស្រេង សុកាន់ណា ហៅ ខ្ញុង បានប្រកាសថា ខ្លួនក្ស័យធន ក្រោយជំពាក់បំណុលជាង៥៧ម៉ឺនដុល្លារ និងបានដើរទៅកាន់សាលាដំបូងរាជធានីភ្នំពេញ បំណងទៅដាក់ពាក្យបណ្ដឹងខ្លួនឯង ខណៈក៏មានម្ចាស់បំណុលមួយចំនួនបានគម្រាមប្ដឹងនាង។
គោលបំណងសំខាន់របស់តារាកំប្លែងរូបនេះ គឺចង់អះអាងនៅខាងមុខសាលាដំបូងបញ្ជាក់ពីជំហររបស់នាងក្នុងការសងប្រាក់គ្រប់ចំនួន ទៅដល់ម្ចាស់បំណុលទាំងអស់ ដោយសុំឲ្យម្ចាស់បំណុលទាំងនោះយោគយល់លើកលែងការប្រាក់ និងទុកពេលឲ្យនាង ដើម្បីរកប្រាក់យកទៅសងគ្រប់ចំនួន។
សរសេរនៅលើទំព័រហ្វេសប៊ុកផ្ទាល់ខ្លួនតារាស្រីសម្បូរវោរហាស័ព្ទរូបនេះ បានអះអាងថា ខ្លួនអាចនឹងជាប់ពន្ធធនាគារថែមទៀតផង ព្រោះពេលនេះនាងអស់លទ្ធភាពក្នុងការរកលុយមកសងម្ចាស់បំណុល ។
ដោយអ្នកនាង ខ្ញុង បានសរសេរថា៖ «នាងខ្ញុំពិតជាបានខ្ចីបំណុលម្ចាស់បំណុលជាច្រើន ទាំងមានសែក គ្មានសែក នាងខ្ញុំពិតជាអស់លទ្ធភាពក្នុងការរកប្រាក់មកសងបំណុលតទៅទៀតហើយ ។ នាងខ្ញុំមានតែត្រូវជាប់ពន្ធនាគារដែល មូលហេតុមិនមានប្រាក់សងម្ចាស់បំណុលតទៅទៀតទេ» ។
បន្ថែមពីនេះបញ្ជាក់ក្នុងការឡាយ នៅមុខសាលាដំបូងរាជធានីភ្នំពេញ ខ្ញុង បានរៀបរាប់ឱ្យដឹងទៀតថា អស់រយៈពេលជាង៣ឆ្នាំមកហើយ ដែលខ្លួនបានបៀមទុក្ខមិនហ៊ាននិយាយប្រាប់អ្នកណា សូម្បីតែស្វាមីរបស់នាង ។ នាងបានជំពាក់បំណុលគេជាង៥៧ម៉ឺនដុល្លារ និងត្រូវររងការគំរាមកំហែងបង្ហោះរូបបង្ខូចកេរ្ដិ៍ឈ្មោះពីសំណាក់ម្ចាស់បំណុល ទាំងជនជាតិចិន និងខ្មែរ ។
ប៉ុន្តែដោយសារការស្រលាញ់អាណិតកូនៗទាំងពីររបស់នាង នាងក៏បានអង្វរកម្ចាស់បំណុលឱ្យអនុគ្រោះខ្លះ និងខំប្រឹងរកលុយពីនេះពីនោះមកដោះស្រាយខ្លះ រក្សាកេរ្ដ៍ឈ្មោះមួយពេលៗ ដើម្បីបានបន្តអាជីពសិល្បៈ ។
បើទោះជាយ៉ាងណា ពេលនេះនាងអស់លទ្ធភាពក្នុងការរកប្រាក់មកសងម្ចាស់បំណុលបន្តទៀតហើយ ហើយនាងអាចនឹងជាប់ពន្ធធនាគារថែមទៀតផង ប្រសិនបើម្ចាស់បំណុលមួយចំនួនមិនអនុគ្រោះ ៕
ប្រភពពីតារាញូស៍
ដេីម្បីកាន់តែជ្រាបច្បាស់សូមទស្សនារូបភាពខាងក្រោមទាំងអស់គ្នា៖
