គេនៅចាំបានថា ម្ចាស់ពានរង្វាន់ Cambodia’s Got Talent រដូវកាលទី១ លោកយឿន ពិសី បានចូលរោងការ កាលពីថ្ងៃទី១៧ ខែមករា ឆ្នាំ២០២១។ ក្រោយរៀបការរួច ក៏ទទួលដំណឹងដ៏រីករាយថា ភរិយា របស់តារាចម្រៀងពិការភ្នែករូបនេះ បានសម្រាលកូនប្រុស ដោយជោគជ័យ ទាំងម្ដាយនិងកូនមានសុភាពល្អ។
ក្នុងពេលនោះ យឿន ពិសី បានបញ្ជាក់ថា «កូនប្រុស (យឿន វីរៈបុត្រ) ចាប់កំណើតនៅថ្ងៃអាទិត្យ ២ កើត ខែ ទុតិយាសាឍ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹង ថ្ងៃទី១១ ខែកក្កដា ឆ្នាំ ២០២១ វេលាម៉ោង 21:12 PM”»។
ក្រោយពន្លឺថ្ងៃ មិនទាន់បានប៉ុន្មានផង ស្រាប់តែទទួលដំណឹងដ៏អកុសលថា កូនរបស់តារាចម្រៀងរូបនេះ មានបញ្ហាភ្នែកត្រូវវះកាត់ ដើម្បីធ្វើការព្យាបាល។ បង្ហោះភ្ជាប់ជាមួយរូបថតកូនរបស់ខ្លួនមុនពេលវះកាត់ កាលពីថ្ងៃទី១៤ ខែតុលា ឆ្នាំ២០២១ យឿន ពិសី បានបញ្ជាក់ថា «នៅថ្ងៃនេះ កូនប្រុសរបស់ខ្ញុំ យឿន វីរបុត្រ បានចូលមន្ទីរពេទ្យវះកាត់ភ្នែកហើយ សង្ឃឹមថាកូនប្រុសរបស់ប៉ាទទួលបាននូវលទ្ធផលល្អ និងបានមើលឃើញដូចមនុស្សទូទៅដែរ ណាកូនសម្លាញ់»។
ដោយឃើញបែបនេះ ម្ចាស់គណនីហ្វេសប៊ុកមួយឈ្មោះ «Meas Sarun Tk» បានលើកជាសំណួរយ៉ាងចាក់ដោតថា «ហេតុអីបានអាអូនចឹង ឬមកពីឈាមដំណាលប៉ា. សុំទោសចង់យាយថា មកពីភ្នែកប្អូនចឹងមែនទេ ទើបបណ្តាលអោយអូនទៅជាចឹងដែរ»។
ជាការឆ្លើយតប ម្ចាស់ពានរង្វាន់ Cambodia’s Got Talent រដូវកាលទី១រូបនេះ បានបញ្ជាក់ថា «បាទ កាលខ្ញុំនៅតូចភ្នែកខ្ញុំមានបញ្ហាឡើងបាយពីកំណើតដូចគ្នាបង ប៉ុន្តែខ្ញុំគ្មានលទ្ធភាពព្យាបាលទើបធ្វើឲ្យហួសពេលសម្រាប់ព្យាបាលដូចនេះហើយភ្នែកខ្ញុំព្យាបាលមិនជាទេ ព្រោះវាវិវត្តទៅជាជំងឺផ្សេងមួយទៀតហើយដែលគេឲ្យឈ្មោះថាជំងឺភ្នែកខ្ជិល»។
តាមរយៈការរៀបរាប់របស់យឺន ពិសី ពាក់ព័ន្ធនឹងភ្នែកឡើងបាយពីកំណើតនេះ ជាសារដាស់តៀនមួយសម្រាប់បងប្អូនប្រជាពលរដ្ឋ ជាអាណាព្យាបាល បើមានក្មេងៗជួបបញ្ហាភ្នែកបែបនេះ ប្រញាប់ទៅព្យាបាលឲ្យទាន់ពេលវេលា កុំឲ្យយឺតពេល ព្យាបាលលែងជានោះ។
សូមជម្រាបថា ក្រោយកូនរបស់ខ្លួនធ្វើការវះកាត់ប្រកបដោយជោគជ័យនៅមន្ទីរពេទ្យកុមារអង្គររួចមក, កាលពីថ្ងៃទី១៥ ខែតុលា ឆ្នាំ២០២០១កន្លងទៅនេះ យឿន ពិសី បានឡាយវីដេអូ បញ្ជាក់ថា កូនរបស់លោកជិតបានមើលឃើញហើយ តែមិនមើលឃើញដូចយើងធម្មតានោះឡើយ គឺឃើញកម្រិតទី១ ហើយយើងនៅមានកម្រិតជាច្រើនទៀត៕ សូមទស្សនាវីដេអូ ខាងក្រោមនេះ ៖
