ក្រោយពីអ្នកស្រី ទ្រី ដាណា ប្រកាសបញ្ចប់ទំនាក់ទំនងជាមួយខ្លួនជាផ្លូវការរួចមក, ពូម៉ៅ ហាក់មិនស្រណុកក្នុងចិត្តឡើយ បានត្រឹមបង្ហោះរូបថត ធ្លាប់សាងអនុស្សាវរីយ៍ជាមួយគ្នាកន្លងមក ព្រមទាំងអង្វរភរិយាលើកលែងទោសឲ្យ ដោយសន្យាមិនឲ្យមានលើកក្រោយទៀតឡើយ។
បង្ហោះភ្ជាប់ជាមួយរូបថតប្រពន្ធ និងកូន កាលពីព្រលប់ថ្ងៃទី១១ ខែតុលា ឆ្នាំ២០២១ ពូម៉ៅ បានរៀបរាប់ថា «សូមជម្រាបសួរបងប្អូន។ ដោយពេលកន្លងមកខ្ញុំមានកំហុសមួយចំនួនចំពោះប្រពន្ធជាទីស្រលាញ់ ឆ្លងកាត់ការពិចារណាមួយរយៈពេលធំ បានយល់ដឹងកំហុសទាំងអស់ច្បាស់លាស់ហើយព្រមកែដើម្បីសុភមង្គលគ្រួសារ»។
ពូម៉ៅ បានអង្វរករភរិយាថា «ប្រពន្ធជាទីស្រលាញ់សូមអូនលើកលែងទោស ព្រមអភ័យទោសអោយបងជាលើកចុងក្រោយ នឹងសូមសន្យា ថាមិនអោយមានលើកក្រោយទៀតឡើយ។ អត់ពីអូននិងកូនមួយរយៈនេះបងពិតជាពិបាករស់នៅណាស់ ព្រោះក្នុងចិត្តបងមានតែអូននិងកូនតែមួយគត់»។
ក្រោយមក នៅព្រឹកថ្ងៃទី១២ ខែតុលា ឆ្នាំ២០២១នេះ បានបង្ហោះរូបថតកាលនៅផ្អែមល្ហែមជាមួយភរិយា អមដោយសារ អង្វរករ ទៀតថា «ជីវិតគ្រួសារអ្នកណាក៏ជួបដែរ តែខ្ញុំជួបផ្ទាល់បានដឹងថា អត់ប្រពន្ធនឹងកូនពិបាកណាស់។ សូមអូនលើកលែងទោសអោយបងម្តងទៅ បងនឹងធ្វើអោយអូនសើចញញឹមអោយបានច្រើន ព្រោះមួយរយៈនេះអូនហត់ណាស់ហើយប្រពន្ធសម្លាញ់»។
តាមរយៈការបង្ហោះសារអង្វរករ ២ថ្ងៃជាប់ៗគ្នានេះ ឃើញថា មានការចាប់អារម្មណ៍ពីអ្នកគាំទ្រ ជាងពេលមុនៗ តែពួកគេ មិនអាចជួយអ្វីបាន បានត្រឹមជូនពរឲ្យពូម៉ៅ ឲ្យឆាប់ជួបជុំក្រុមគ្រួសារវិញ។ ខណៈមួយចំនួនទៀត បានផ្ដល់យោបល់ស្រដៀងគ្នា ឲ្យពូម៉ៅ ឡាយជាសាធារណៈ សុំទោសភរិយា ក្រែងគាត់អភ័យទោសអោយ៕
