ក្រោយពីអានអត្ថបទមួយនៅលើបណ្ដាញអ៊ីនធឺណិត ហើយឃើញថា ល្អនោះ នៅថ្ងៃទី៨ ខែតុលា ឆ្នាំ២០២១នេះ អ្នកឧកញ៉ា គិត ម៉េង បានចែករំលែកអត្ថបទនេះ នៅលើទំព័រហ្វេសប៊ុករបស់ខ្លួន ដើម្បីបំផុតគំនិតឲ្យ កុំបាត់បង់ជំនឿចិត្ត នៅពេលអ្នកឃើញអ្នកដទៃសម្រេចបានជោគជ័យនោះ។
បង្ហោះភ្ជាប់ជាមួយរូបថតជាច្រើនសន្លឹក អ្នកឧកញ៉ា គិតម៉េង បានរៀបរាប់ដូច្នេះថា «ថ្មីៗនេះ ខ្ញុំបានអានអត្ថបទមួយនៅលើប្រព័ន្ធអ៊ិនធឺណែតដែលបំផុសគំនិតវិជ្ជមានអំពីការឱ្យតម្លៃលើភាពខុសគ្នានៃជោគជ័យនិងសមិទ្ធផល ដែលខ្ញុំគិតថាគួរចែករំលែក។
សត្វដំរី និងសត្វឆ្កែមានកូនក្នុងពេលតែមួយ។ បីខែក្រោយមក សត្វឆ្កែបានផ្តល់កំណើតដល់កូនឆ្កែប្រាំមួយក្បាល។ ប្រាំមួយខែក្រោយមក សត្វឆ្កែក៏មានកូនម្តងទៀត ហើយប្រាំបួនខែទៀតបានបង្កើតកូនឆ្កែជាច្រើនទៀត។
ដំណើរនេះបានកើតឡើងជាបន្តបន្ទាប់។ ១៨ខែក្រោយមក សត្វឆ្កែបានចូលមកជិតសត្វដំរី ហើយសួរថា៖ «តើអ្នកប្រាកដទេថាអ្នកមានកូន? យើងមានកូននៅថ្ងៃតែមួយ ខ្ញុំបានផ្តល់កំណើតបីដងដល់កូនខ្ញុំរាប់សិបក្បាលរួចមកហើយ ឥឡូវនេះពួកគេធំឡើងហើយ តែអ្នកនៅតែមិនទាន់កើត តើមានអ្វីកើតឡើង?” ។
សត្វដំរីបានឆ្លើយថា៖ «មានរឿងមួយដែលខ្ញុំចង់ឱ្យអ្នកយល់។ អ្វីដែលខ្ញុំមាននេះ មិនមែនជាកូនឆ្កែទេ តែជាសត្វដំរី។ ខ្ញុំកើតបានតែមួយប៉ុណ្ណោះក្នុងរយៈពេលពីរឆ្នាំម្តង។ ពេលកូនរបស់ខ្ញុំកើតមក ពិភពលោកមានអំណរសាទរ នៅពេលកូនរបស់ខ្ញុំឆ្លងកាត់ផ្លូវ មនុស្សគ្រប់គ្នាឈប់ ហើយមើលដោយការកោតសរសើរ។ អ្វីដែលខ្ញុំបង្កើតមកនឹងទាក់ទាញចំណាប់អារម្មណ៍មនុស្សជាច្រើន។ ដូច្នេះ អ្វីដែលខ្ញុំកំពុងមាននេះ គឺមានភាពខ្លាំងនិងអស្ចារ្យ» ។
សូមកុំបាត់បង់ជំនឿចិត្ត នៅពេលអ្នកឃើញអ្នកដទៃសម្រេចបានជោគជ័យ។ សូមកុំច្រណែននឹងលទ្ធផលដែលអ្នកដទៃទទួលបាន។ បើអ្នកមិនទាន់ទទួលបានជោគជ័យ សូមកុំអស់សង្ឃឹម។ សូមនិយាយទៅកាន់ខ្លួនអ្នកថា៖ «ពេលវេលារបស់ខ្ញុំនឹងមកដល់ ហើយនៅពេលដែលវាមកដល់ មនុស្សជាច្រើននឹងកោតសរសើរពីសមិទ្ធផលនោះ»។
មនុស្សផ្សេងគ្នាពិតជាឱ្យតម្លៃខុសគ្នាទៅលើនិយមន័យនៃភាពជោគជ័យ។ អ្នកអាចស្វែងយល់ពីគុណតម្លៃរបស់អ្នកផងដែរ!
អត្ថបទនេះអាចធ្វើឱ្យអ្នកគិតអំពីខ្លួនឯង ហើយខ្ញុំក៏ជឿជាក់លើការដែលយើងទាំងអស់គ្នាត្រូវមានភាពជឿជាក់លើខ្លួនឯងឱ្យបានច្រើន។ សូមសរសើរដល់អ្នកនិពន្ធរឿងដែលបំផុសគំនិតល្អៗនេះ»។
តាមរយៈនេះ អ្នកបានអានអត្ថបទនេះហើយ នាំគ្នាអរគុណ និងលើកឡើងថា «ជាគតិបណ្ឌិតដ៏ល្អ សូមថ្លែងអំណរគុណអ្នកឧកញ៉ា ដែលបានចែករំលែក, បន្ទាប់ពីអត្ថបទនេះ ខ្ញុំបាទ សូមអរគុណច្រើន និងកោតសរសើរដោយស្មោះនូវរឿងនិទានមួយនេះ ប្រកបដោយអត្ថន័យរស់រវើក ដែលជាកពា្ចក់ឆ្លុះបញ្ចាំងពីជីវិតផ្សេងព្រេងនៃបុគ្គលគ្រប់រូប គួរពិចារណាតាមការគួរ។,
អត្ថបទនេះល្អណាស់បង បង្រៀនមនុស្សឲ្យស្ថិតក្នុងការចេះតាំងចិត្ត ភាពអត់ធ្មត់ ដើម្បីសម្រេចមហិច្ឆតានៅថ្ងៃខាងមុខ, អត្ថន័យនេះល្អណាស់ លោកឧកញ៉ា គឺគ្រប់រូបស្ត្រីតែងតែចង់បាន ភាពជោគជ័យ ស្ថិតនៅលើប្តី និងប្រពន្ធ សំណាបយោងដីស្រីយោងបុរស, គតិល្អ សូមអរគុណអ្នកឧកញ៉ា ចំពោះការចែករំលែក ក្រោយអានអត្ថបទចប់ មានថាមពលភ្លាមៗ ពិតជាអស្ចារ្យណាស់
ខ្ញុំបានអាននិងមើលអត្ថបទរបស់ លោកពូឧកញ៉ាហើយ ធ្វើឲ្យខ្ញុំគិតថា ជីវិតនិងការតស៊ូរបស់ខ្ញុំ ដែលខំតស៊ូ ប្រឹងប្រែងអស់ពីកម្លាំងចិត្ត តែបែរគ្រប់យ៉ាងវាមិនបានដូចបំណង ហើយវាបែរជា ធ្វើឲ្យខ្ញុំគិតខ្លួនឯងថា ជីវិតខ្ញុំមិនអាចដើរទៅមុខបាន ព្រោះកម្លាំងទឹកចិត្តរបស់ខ្ញុំ ពេលនេះ ធ្លាក់ដល់កម្រិតសូន្យ តែកម្លាំងកាយ ចេះតែធ្វើឲ្យខ្ញុំ គិតថា ថ្ងៃណាមួយ ក្ដីសង្ឃឹមនឹងការស្រមៃរបស់ខ្ញុំ នឹងបានដូចបំណង»៕
