គេចាំបានថា អតីតតារាសម្ដែងស្រីដ៏មានប្រជាប្រិយភាព កែវ វល័ក្ខ បានភ្ជាប់ស្នេហ៍ជាមួយ អតីតពិធីករដ៏ល្បី លោក លាន អាហ្វ្រីលគីនីន ជាង ១០ ឆ្នាំមកហើយ បើទោះ មិនបានរៀបការតាមប្រពៃណីខ្មែរ តែពួកគេទាំងពីរ បានទទួលចំណងដៃកូនប្រុសស្រីចំនួន៤នាក់។
ចាប់តាំងពីចាប់ដៃជាប្តីប្រពន្ធមក ទាំងលោក អាព្រីល គីនីន និង អ្នកនាង កែវ វល័ក្ខ បានដើរចេញទាំងស្រុងពីអាជីពសិល្បៈ ដោយលោក គីនីន បានងាកមករកការរកស៊ីវិញ រហូតបច្ចុប្បន្ន លោកក៏មានឈ្មោះជាឧកញ៉ាម្នាក់ផងដែរ។
ដោយឡែក នៅថ្ងៃទី២៩ ខែកញ្ញា ឆ្នាំ២០២១ ស្រាប់តែ អ្នកនាង កែវ វល័ក្ខ បានបង្ហោះរូបថតស្វាមីរបស់ខ្លួន គឺលោក អាព្រីល គីនីន អមដោយសារយ៉ាងភ្ញាក់ផ្អើលថា «អញប្រាប់ហើយ ថាជក់ថ្នាំល្មមៗបានហើយ បើជក់ខ្លាំងពេក ពេលបែក វ៉ៃតែអញនិងកូនទេ អាកើតចេញ ពី…»។
ងាកមកលោក អាព្រីល គីនីន វិញ មិនបានធ្វើការឆ្លើយតបអ្វីទេ ហើយនៅថ្ងៃទី៣០ ខែកញ្ញា ឆ្នាំ២០២១នេះ បែរជាបង្ហោះរូបថតក្នុងដំណើរកម្សាន្តជាច្រើនសន្លឹកនៅលើគណនីហ្វេសប៊ុករបស់ខ្លួន ដោយប្រាប់ថា «ទេសភាពស្អាតណាស់ជីវិតត្រូវតែរីករាយ….ចង់អោយខ្លួនមានសេចក្តីសុខត្រូវចំណាយពេលសំរាប់ខ្លួនឯង..កុំអោយជីវិតប៊ោកប្រាស់យើងប្រើរ..តោះត្រីស្រែ របស់ស្រែពិតៗ»។
គួរបញ្ជាក់ថា រឿងរ៉ាវគ្រួសារ រវាង អតីតអ្នកសិល្បៈទាំង២ខាងលើនេះ មិនមែនកើតឡើងជាលើកទី១នោះទេ ដោយកន្លងមក អ្នកនាង កែវ វល័ក្ខ បានចោទ លោក អាព្រីល គីនីន ជាស្វាមី ថាលួចលាក់មានស្រីក្រៅ ទៀតផង៕
