ស្របពេល ដែលតារាចម្រៀង តារាសម្ដែង ជាច្រើនកំពុងតែព្យាយាមលាក់បាំងពីជីវិតឯកជន សមាសភាពប្ដីប្រពន្ធ និងកូន ដើម្បីរក្សាប្រជាប្រិយភាព និងភាពល្បីល្បាញនៅក្នុងពិភពសិល្បៈនោះ គេសង្កេតឃើញតារាចម្រៀងល្បីឈ្មោះលោក ឆាយ វីរៈយុទ្ធ បែរជាបើកចំហ ពីជីវិតឯកជនរបស់ខ្លួនជាប្រចាំទៅណាមកណាជាមួយគ្នា។
ស្ទើរតែគ្រប់កម្មពិធីតូចធំ ការប្រគុំតន្ត្រី ឬឡើងឆាកទូរទស្សន៍នានា ឆាយ វីរៈយុទ្ធ តែងតែបណ្ដើរភរិយារូបស្រស់ មិនដែលឃ្លាតមួយជំហានណាឡើយ។ មិនតែប៉ុណ្ណោះ តារាប្រុសនិយមបទចម្រៀងមនោសញ្ចេតនារូបនេះ តែងតែបង្ហាញភាពផ្អែមល្ហែមជាមួយប្រពន្ធកូន នៅលើបណ្ដាញសង្គមជាញឹកញាប់ទៀតផង។
ការបើកចំហរពីជីវិតឯកជន ពិសេសរឿងគ្រួសារប្រពន្ធកូនរបស់លោក ឆាយ វីរៈយុទ្ធ នោះ ធ្វើឲ្យមានការលើកឡើង និងចោទសួរជាច្រើនថា តើតារាចម្រៀងប្រុសរបស់សាន់ដេរូបនេះ មិនខ្លាចបាត់បង់ប្រជាប្រិយភាព ឬធ្លាក់កូដទេ ឬយ៉ាងណា?។
ពាក់ព័ន្ធនឹងករណីនេះ ឆាយ វីរៈយុទ្ធ បានថ្លែងប្រាប់ តារាញូស៍ ថា លោកមិនដែលខ្លាចបាត់បង់ប្រជាប្រិយភាព ឬភាពល្បីល្បាញ ដោយសារតែការបង្ហាញមុខប្រពន្ធកូន ឬជីវិតឯកជនរបស់ខ្លួនឡើយ ព្រោះស្ថិតនៅក្នុងវ័យមួយគឺយើងមិនអាចនៅលីវរហូតបានទេ។
ម្យ៉ាងទៀតនេះក៏ជាសកម្មភាពមួយបង្ហាញពីការផ្ដល់ក្រុមគ្រួសារផងដែរដ្បិតភរិយាតែងជាអ្នកនៅពីក្រោយជម្រុញលើកទឹកចិត្តផ្ដល់កម្លាំងចិត្តដែលជាផ្នែកមួយនៃភាពជោគជ័យ។
លោកបានរៀបរាប់ថា៖ «ទស្សនៈរបស់ខ្ញុំ គឺខ្ញុំចង់បង្ហាញ ពីព្រោះក្នុងវ័យមួយយើងមិនអាចនៅលីវរហូតទេ ។ អញ្ចឹងហើយគឺយើងត្រូវតែបង្ហាញអ្វីដែលយើងមានដល់ទស្សនិកជន ខ្ញុំអត់លាក់លៀមពួកគាត់ទេ»។
ឆាយ វីរៈយុទ្ធ អះអាងទៀតថា ជីវិតពេលនៅកំលោះ និងមានគ្រួសារ គឺខុសគ្នាស្រឡះ។ ពោលគឺនៅពេលដែលមានគ្រួសារ និងមានកូន គឺធ្វើឲ្យជីវិតរបស់លោកកាន់តែស្រស់ស្រាយជាងមុន និងប្ដូរទៅមនុស្សថ្មី ដែលចង់ធ្វើអ្វីៗដើម្បីប្រពន្ធកូនបន្ត ។
«ខ្ញុំពិតជាសប្បាយរីករាយមែនទែន ព្រោះកាលដែលអត់ទាន់មានគឺដូចជាហេលហាល តែដល់ពេលយើងមានកូន មានអារម្មណ៍ថាជីវិតយើងស្រស់ស្រាយ ហើយប្ដូរទៅមួយទៀត គឺចង់ស្វែករកឱ្យកូនបន្តទៀត»។ លោក ឆាយ វីរៈយុទ្ធអះអាងយ៉ាងដូច្នេះ។
គួរបញ្ជាក់ថា ឆាយ វីរៈយុទ្ធ គឺជាតារាចម្រៀងមួយរូប ដែលមានឈ្មោះបោះសំឡេងខ្លាំងនៅក្នុងចំណោមតារាល្បីៗជាច្រើននៅក្នុងប្រទេស ។ ឆាយ វីរៈយុទ្ធ បានបញ្ចប់ភាពនៅលីវរបស់ខ្លួន កាលពីខែឧសភា ឆ្នាំ២០១៧ ដោយសម្រេចរៀបការជាមួយកូនថៅកែរោងម៉ាស៊ីនដ៏ធំនៅខេត្តកំពង់ចាម គឺអ្នកនាង សែ ចាន់ឌី និងបានកាដូចំណងដៃកូនស្រីយ៉ាងស្រស់ស្អាតម្នាក់ ឈ្មោះ វីរៈយុទ្ធ អភិជាតាទេវី ហៅ អាតារ៉ា កាលពីខែកញ្ញា ឆ្នាំ២០១៩៕ ប្រភព ៖ តារាញូស៍
